AP FA2 Project Works 2026 — ఆరు నుంచి పది తరగతుల వరకు, ఈ ఏడాది FA2 సిలబస్‌లో ఉన్న పాఠాల మీదే ప్రాజెక్ట్ అంశాలు. ప్రతి అంశానికీ ఏమి చేయాలో కూడా ఇచ్చాం. ఎక్కడి నుంచీ కాపీ చేయనవసరం లేదు.
ఈ పేజీలో ఏమి ఉంది
- ఆరు నుంచి పది తరగతులకు పాఠాల వారీ ప్రాజెక్ట్ అంశాలు
- ప్రతి అంశానికీ ఏమి సేకరించాలి, ఏమి రాయాలి
- మంచి ప్రాజెక్ట్ ఆరు భాగాలు
- మార్కులు ఎక్కడ పోతాయి
- పద్నాలుగు FAQs
ప్రాజెక్ట్ వర్క్ అంటే ఏమిటి
FA2 అంటే ఒక్క రాత పరీక్ష కాదు. ప్రాజెక్ట్ వర్క్ దానికి వేరే సాధనం — దీనికి విడిగా మార్కులు ఉంటాయి, పరీక్ష రోజున కాకుండా ముందే సమర్పించాలి.
FA2 లో ఒక్కో సబ్జెక్ట్‌కు మొత్తం 50 మార్కులు. 2025-26 CCE మార్గదర్శకాల ప్రకారం రాత పరీక్షకు 35, ప్రాజెక్ట్‌కు 5, నోట్‌బుక్ (రాత పని) కు 5, తరగతి భాగస్వామ్యానికి 5. ఏ సాధనానికి ఎన్ని మార్కులు అనేది మీ పాఠశాల ఉపాధ్యాయులను అడిగి నిర్ధారించుకోండి — ఇది ఏటా మారవచ్చు, మేము ఊహించి చెప్పం.
ఇక్కడ ప్రాజెక్ట్ అంశాలు ఎందుకు, PDF లు ఎందుకు కాదు. ఇంటర్నెట్‌లో దొరికే చాలా ప్రాజెక్ట్ ఫైళ్లు 2018, 2019 నాటివి — అప్పటి సిలబస్ వేరు. పైగా ఒకే ఫైల్ వందలమంది దిగుమతి చేసుకుంటే ఉపాధ్యాయుడికి ఒకేలాంటి ప్రాజెక్టులు వరుసగా వస్తాయి. ఈ పేజీలోని అంశాలన్నీ మీ ఇల్లు, మీ ఊరు, మీ తరగతి నుంచి సమాచారం సేకరించేవి — అందుకే ఒక్కొక్కరిదీ వేరుగా ఉంటుంది.
SCERT 23.09.2026 సిలబస్ ప్రకారం సవరించాం. 6 నుంచి 9 తరగతుల తెలుగుకు ఇప్పుడు ప్రధాన పాఠం మీద ఒక అంశం, దాని కింద ఇంకొకటి ఉన్నాయి. “SCERT FA2 జాబితాలో పేరు లేదు” అని ఉన్నవి అనుబంధ పాఠాలు; ఉపవాచకం FA2 లో ఉందో లేదో SCERT పత్రం చెప్పలేదు, కాబట్టి వాటిని ఎంచుకునే ముందు ఉపాధ్యాయుడిని అడగండి. 9వ జీవశాస్త్రం అంశాన్ని మొక్కల కణజాలాలకు మార్చాం. పదో తరగతి సోషల్‌లో SCERT ప్రాజెక్టుకు మాత్రమే ఇచ్చిన ఉపాంశం మీద కొత్త అంశం చేర్చాం. ప్రతి తరగతి అధికారిక పాఠాల జాబితా AP FA2 Syllabus 2026-27 Class 1 to 10 పేజీలో ఉంది.
SCERT అధికారిక జాబితా ప్రకారం 6 నుంచి 10 తరగతుల FA2 పాఠాలు — ప్రాజెక్ట్ అంశం వీటిలోంచే ఎంచుకోండి.
పదో తరగతి — ప్రాజెక్ట్ అంశాలు
FA2 సిలబస్ పాఠాల ఆధారంగా. పూర్తి సిలబస్, సాధన ప్రశ్నపత్రాలు AP 10th Class FA2 Question Papers 2026-27 పేజీలో ఉన్నాయి.
| సబ్జెక్ట్ | FA2 పాఠం | ప్రాజెక్ట్ అంశం | ఏమి చేయాలి |
|---|---|---|---|
| తెలుగు | జలియన్ వాలా బాగ్ (పాఠం 5) | స్వాతంత్ర్య పోరాట ఘటనల కాలరేఖ | జలియన్ వాలా బాగ్‌కు ముందూ తర్వాతా జరిగిన ఐదు ఘటనలు తేదీలతో ఒక చార్టుపై వరుసగా రాయండి. ప్రతి ఘటనకు రెండు వాక్యాలు చాలు. |
| తెలుగు | ప్రకృతి సందేశం (పాఠం 6) | మా ఊరి చెట్లు — ఒక సర్వే | మీ వీధిలో ఉన్న చెట్ల పేర్లు, సంఖ్య రాసుకోండి. పాఠంలోని సందేశానికి మీ ఊరి పరిస్థితిని పోల్చి అరపేజీ రాయండి. |
| తెలుగు | అయోధ్యా, అరణ్య, కిష్కింధాకాండలు | మూడు కాండల పాత్రల పటం | ఒక్కో కాండలో కొత్తగా వచ్చే పాత్రలు, వాటి పని — మూడు నిలువు వరుసల పట్టికగా రాయండి. |
| హిందీ | दक्षिणी गंगा गोदावरी (పాఠం 9) | గోదావరి ప్రయాణ పటం | గోదావరి పుట్టిన చోటు నుంచి సముద్రం చేరే వరకు మార్గాన్ని పటంలో గీసి, పాఠంలో రచయిత చూసిన స్థలాలను గుర్తించండి. |
| ఇంగ్లిష్ | Coorg / Tea from Assam | Two places, one notebook | పాఠాల్లోని కూర్గ్, అస్సాం గురించి ఒక్కో పేజీ — ఎక్కడ ఉంది, ఏం పండుతుంది, ప్రజలు ఎలా ఉంటారు. చివర ఆంధ్రప్రదేశ్‌లోని ఒక ప్రాంతంతో పోల్చండి. |
| గణితం | అంకశ్రేఢులు | ఇంట్లో కనిపించే అంకశ్రేఢులు | కరెంటు బిల్లు, పొదుపు, మెట్ల ఎత్తు — ఇలా వరుసగా పెరిగే మూడు ఉదాహరణలు సేకరించి, ప్రతిదానికీ సామాన్య భేదం d కనుక్కోండి. |
| గణితం | సాంఖ్యక శాస్త్రం | మా తరగతి దత్తాంశం | ముప్ఫై మంది సహవిద్యార్థుల ఎత్తు లేదా వయసు సేకరించి సగటు, మధ్యగతం, బహుళకం లెక్కించి ఒక కమ్మీ చిత్రం గీయండి. |
| భౌతిక శాస్త్రం | మానవ నేత్రం | కంటి లోపాలు — ఇంటి సర్వే | ఇంట్లో, చుట్టుపక్కల కళ్లద్దాలు వాడేవారిని అడిగి ఏ లోపమో రాసుకోండి. హ్రస్వదృష్టి, దీర్ఘదృష్టి ఎన్నెన్ని ఉన్నాయో లెక్కించి కారణం రాయండి. |
| భౌతిక శాస్త్రం | లోహాలు – అలోహాలు | ఇంట్లోని లోహాలు | వంటగదిలో ఉన్న వస్తువులు ఏ లోహంతో చేశారో పట్టిక వేయండి. ఏది తుప్పు పడుతుంది, ఏది పట్టదు — గమనించి కారణం రాయండి. |
| జీవశాస్త్రం | నియంత్రణ – సమన్వయం | ప్రతీకార చర్యల ప్రయోగం | కంటిలో వెలుతురు పడినప్పుడు కనుపాప మారడం, మోకాలి కుదుపు — ఇలా మూడు ప్రతీకార చర్యలు ఇంట్లో చూసి, ఏ నాడి పనిచేసిందో రాయండి. |
| సాంఘిక శాస్త్రం | నీటి వనరులు | మా ఇంటి నీటి లెక్క | ఒక రోజు ఇంట్లో ఎన్ని బకెట్ల నీరు ఏ పనికి వాడారో రాసుకోండి. వృథా ఎక్కడ జరుగుతోందో, ఎలా ఆపవచ్చో రెండు సూచనలు రాయండి. |
| సాంఘిక శాస్త్రం | ఆర్థిక రంగాలు | మా ఊరి పనులు — మూడు రంగాలు | మీకు తెలిసిన ఇరవై మంది ఏ పని చేస్తారో అడిగి ప్రాథమిక, ద్వితీయ, తృతీయ రంగాలుగా విభజించి కమ్మీ చిత్రం గీయండి. |
| సాంఘిక శాస్త్రం | The Making of a Global World — ఉపాంశం 4 (ప్రాజెక్టుకు మాత్రమే) | యుద్ధానంతర ప్రపంచం — ఒక కాలరేఖ | పాఠంలోని నాలుగో ఉపాంశం (Rebuilding a World Economy: The Post-war Era) చదివి Bretton Woods సమావేశం, IMF, World Bank ఏర్పాటు, వలస దేశాలకు స్వాతంత్ర్యం, Bretton Woods వ్యవస్థ ముగింపు — ఇవి ఏ క్రమంలో జరిగాయో కాలరేఖగా గీయండి. SCERT ఈ ఉపాంశాన్ని రాత పరీక్ష నుంచి తీసేసి ప్రాజెక్టుకు మాత్రమే ఇచ్చింది. |
తొమ్మిదో తరగతి — ప్రాజెక్ట్ అంశాలు
తెలుగులో ప్రథమ భాష, ద్వితీయ భాష పుస్తకాలు వేరు — మీ అట్ట మీద పరిమళం ఉందా, సుధ-1 ఉందా చూసుకుని ఆ వరుస తీసుకోండి.
| సబ్జెక్ట్ | FA2 పాఠం | ప్రాజెక్ట్ అంశం | ఏమి చేయాలి |
|---|---|---|---|
| తెలుగు — ప్రథమ భాష | ప్రియమైన నాన్నకు | ఇంట్లో పెద్దవారికి ఒక లేఖ | పాఠంలాగే మీ నాన్నకు లేదా ఇంట్లో పెద్దవారికి ఒక లేఖ రాయండి. స్థలం, తేదీ, సంబోధన, విషయం, ముగింపు — ఐదు భాగాలూ ఉండాలి; ప్రతి భాగం పక్కన దాని పేరు పెన్సిల్‌తో గుర్తించండి. |
| తెలుగు — ప్రథమ భాష | దువ్వూరి సుబ్బమ్మ, అయ్యదేవర కాళేశ్వరరావు (SCERT FA2 జాబితాలో పేరు లేదు) | ఇద్దరి జీవితాలు — ఒక పోలిక | ఇద్దరి పుట్టిన ఊరు, చేసిన పని, సమాజానికి ఇచ్చినది — మూడు వరుసల పట్టికగా రాసి, ఇద్దరిలో ఒకరిపై అరపేజీ. |
| తెలుగు — ద్వితీయ భాష | ప్రకృతి, మెట్లు, జాబిల్లి (సుధ-1) | మూడు పాఠాలు — మూడు సందేశాలు | ఒక్కో పాఠం నుంచి రచయిత చెప్పదలచుకున్న ఒక్క వాక్యం రాసి, దానికి మీ జీవితంలోని ఒక ఉదాహరణ జతచేయండి. |
| ఇంగ్లిష్ | The Adventures of Toto / Iswaran the Storyteller | A character diary | Toto లేదా Iswaran స్థానంలో మీరు ఉంటే — వరుసగా మూడు రోజుల డైరీ, రోజుకు ఐదు వాక్యాలు. |
| గణితం | Coordinate Geometry | మా ఊరి మ్యాప్ నిరూపకాలతో | పాఠశాల, ఇల్లు, దుకాణం, ఆసుపత్రి — నాలుగు స్థలాలను గ్రాఫ్ కాగితంపై బిందువులుగా పెట్టి, వాటి మధ్య దూరాలు దూర సూత్రంతో లెక్కించండి. |
| భౌతిక శాస్త్రం | Force and Laws of Motion | న్యూటన్ నియమాలు — ఇంటి ఉదాహరణలు | మూడు నియమాలకూ ఇంట్లో లేదా ఆటస్థలంలో చూసిన ఒక్కో ఉదాహరణ, బొమ్మతో సహా. |
| జీవశాస్త్రం | Tissues — 2.1, 2.2 (మొక్కల కణజాలాలు) | మొక్కల కణజాలాల నమూనా పుస్తకం | ఉల్లిపొర, కొబ్బరి పీచు, ఆకు తొడిమ, వేరు లేదా కాండం కొన — నాలుగు నమూనాలు సేకరించి అతికించండి. ఒక్కో దానిలో ఉండే కణజాలం (బాహ్యచర్మం, దృఢ కణజాలం, స్థూలకోణ కణజాలం, విభాజ్య కణజాలం) పేరు, పని రాయండి. జంతు కణజాలాలు ఈసారి FA2 లో లేవు. |
| సాంఘిక శాస్త్రం | Physical Features of India | భారత భౌతిక స్వరూపాలు — పటం | ఖాళీ భారత పటంలో పర్వతాలు, మైదానాలు, పీఠభూములు, ఎడారి, తీర ప్రాంతాలు రంగులతో గుర్తించి పట్టిక ఇవ్వండి. |
| సాంఘిక శాస్త్రం | People as Resource | మా కుటుంబం — నైపుణ్యాల జాబితా | ఇంట్లో ఎవరు ఏ నైపుణ్యంతో సంపాదిస్తున్నారో రాసి, చదువు వల్ల ఆ నైపుణ్యం ఎలా పెరుగుతుందో రెండు వాక్యాలు. |
ఎనిమిదో తరగతి — ప్రాజెక్ట్ అంశాలు
ఎనిమిదో తరగతి FA2 సిలబస్ పాఠాల ఆధారంగా.
| సబ్జెక్ట్ | FA2 పాఠం | ప్రాజెక్ట్ అంశం | ఏమి చేయాలి |
|---|---|---|---|
| తెలుగు | శతక సౌరభం | శతకాల పట్టిక | ఇంట్లో పెద్దలను అడిగి లేదా గ్రంథాలయంలో చూసి ఐదు శతకాల పేర్లు, రాసిన కవి, మకుటం — మూడు నిలువు వరుసల పట్టిక. ఒక్కో శతకం నుంచి మీకు నచ్చిన ఒక పద్యం, దాని భావం రెండు వాక్యాల్లో. |
| తెలుగు | ఫాతిమా షేక్, రాగతి పండరి (SCERT FA2 జాబితాలో పేరు లేదు) | సమాజాన్ని మార్చినవారు | ఇద్దరిలో ఒకరిని ఎంచుకుని — ఏ కాలం, ఏ సమస్య, ఏం చేశారు, ఇప్పుడు ఏం మిగిలింది. నాలుగు శీర్షికల కింద అరపేజీ. |
| హిందీ | श्रीहरिकोटा | శ్రీహరికోట — మన రాష్ట్రం నుంచి ఆకాశంలోకి | శ్రీహరికోట ఎక్కడ ఉంది, అక్కడి నుంచి వెళ్లిన మూడు ఉపగ్రహాల పేర్లు, ఒక్కో దాని పని — పటంతో సహా. |
| ఇంగ్లిష్ | Verghese Kurien – I Too Had a Dream | From milk to a movement | మీ ఇంటికి పాలు ఎక్కడి నుంచి వస్తాయో తెలుసుకుని, రైతు నుంచి మీ ఇంటి దాకా ఉన్న దశలను గీయండి. |
| భౌతిక శాస్త్రం | Pressure and its Effects | ఇంట్లో పీడనం | కత్తి అంచు, సూది మొన, బ్యాగు వెడల్పాటి పట్టీలు, ట్రాక్టర్ వెడల్పు టైర్లు — ఐదు ఉదాహరణలు సేకరించి, ప్రతిచోటా తాకే వైశాల్యం తగ్గితే పీడనం పెరుగుతుందా తగ్గుతుందా అని బొమ్మతో రాయండి. |
| జీవశాస్త్రం | Health | మా ఇంటి టీకాల కార్డు | ఇంట్లో చిన్నపిల్లల టీకా కార్డు లేదా అంగన్వాడీ రికార్డు చూసి ఏ వయసులో ఏ టీకా వేశారో పట్టిక వేయండి. ఒక్కో టీకా ఏ వ్యాధి నుంచి కాపాడుతుందో పక్కన రాయండి. |
| గణితం | FA2 అధ్యాయాలు | సూత్రాల గోడ చార్టు | FA2 అధ్యాయాల్లోని ప్రతి సూత్రం ఒక చార్టుపై, పక్కన ఒక్కో పరిష్కరించిన ఉదాహరణ. |
| సాంఘిక శాస్త్రం | FA2 అధ్యాయాలు | మా మండలం — ఒక పరిచయం | మీ మండలం జనాభా, ప్రధాన వృత్తులు, పంటలు, నీటి వనరు — అందుబాటులో ఉన్న సమాచారంతో ఒక పేజీ నివేదిక. |
ఏడో తరగతి — ప్రాజెక్ట్ అంశాలు
ఏడో తరగతి పాఠాల్లో మన ప్రాంతపు ఉత్సవాలు ఎక్కువ — వాటిని ప్రాజెక్టుకు వాడుకుంటే సమాచారం ఇంట్లోనే దొరుకుతుంది.
| సబ్జెక్ట్ | FA2 పాఠం | ప్రాజెక్ట్ అంశం | ఏమి చేయాలి |
|---|---|---|---|
| తెలుగు | చిన్ని శిశువు (అన్నమయ్య కీర్తన) | అన్నమయ్య కీర్తనల సేకరణ | ఇంట్లో, గుడిలో, రేడియోలో వినే మూడు అన్నమయ్య కీర్తనల మొదటి పంక్తులు సేకరించండి. అన్నమయ్య గురించి పెద్దలను అడిగి ఐదు వాక్యాలు రాయండి — ఎక్కడివారు, ఏ దేవుని మీద కీర్తనలు రాశారు. |
| తెలుగు | కోటప్పకొండ ప్రభల తిరునాళ్లు, రొట్టెల పండుగ, అహోబిలం పార్వేట (SCERT FA2 జాబితాలో పేరు లేదు) | మా ప్రాంతపు జాతర | పాఠాల్లో ఉన్న మూడు ఉత్సవాలు ఏ జిల్లాలో జరుగుతాయో పటంలో గుర్తించి, మీ ఊరి జాతర గురించి పది వాక్యాలు రాయండి. |
| తెలుగు | మర్రిచెట్టు | ఒక చెట్టు — ముప్ఫై రోజులు | ఇంటి దగ్గరి ఒక మొక్కను ముప్ఫై రోజులు గమనించి, వారానికి ఒకసారి ఎత్తు, ఆకుల సంఖ్య రాసి చివర ఒక గ్రాఫ్. |
| ఇంగ్లిష్ | Animals, Birds and Dr. Dolittle | Birds around my home | ఒక వారం పాటు ఇంటి చుట్టూ కనిపించిన పక్షుల పేర్లు, సంఖ్య రాసి, ఒక్కో దాని ఆహారం ఏమిటో రాయండి. |
| గణితం | Parallel and Intersecting Lines | ఇంట్లోని సమాంతర రేఖలు | కిటికీ, గ్రిల్, పలక, నేలపై టైల్స్ — సమాంతర, ఖండన రేఖలు కనిపించే ఐదు చోట్లను గీసి కోణాలు గుర్తించండి. |
| సైన్స్ | Electric Circuits | సాధారణ వలయం | బ్యాటరీ, బల్బు, తీగతో ఒక వలయం చేసి, స్విచ్ ఉన్నప్పుడు లేనప్పుడు ఏమవుతుందో బొమ్మతో రాయండి. |
ఆరో తరగతి — ప్రాజెక్ట్ అంశాలు
ఆరో తరగతికి ప్రాజెక్ట్ సరళంగా, చేతితో చేసేదిగా ఉంటే చాలు.
| సబ్జెక్ట్ | FA2 పాఠం | ప్రాజెక్ట్ అంశం | ఏమి చేయాలి |
|---|---|---|---|
| తెలుగు | సమయస్ఫూర్తి | సమయస్ఫూర్తి కథ — నా మాటల్లో | ఉపాయంతో ఆపద నుంచి బయటపడిన ఒక కథను ఇంట్లో పెద్దల నుంచి విని పది వాక్యాల్లో రాయండి. కథలోని ఉపాయం ఏమిటో ఒక్క వాక్యంలో గుర్తించి, నాలుగు బొమ్మలు గీయండి. |
| తెలుగు | అమరజీవి పొట్టి శ్రీరాములు, పింగళి వెంకయ్య (SCERT FA2 జాబితాలో పేరు లేదు) | మన రాష్ట్రానికి పేరు తెచ్చినవారు | ఇద్దరి బొమ్మలు అతికించి, ఒక్కొక్కరి గురించి ఐదు వాక్యాలు — ఏం చేశారు, ఎందుకు గుర్తుంచుకుంటాం. |
| తెలుగు | మాకొద్దీ తెల్లదొరతనం | పాట — అర్థం — సందర్భం | పాఠంలోని పాటను శుభ్రంగా రాసి, కష్టమైన పది పదాలకు అర్థాలు, ఆ పాట ఎప్పుడు పుట్టిందో రెండు వాక్యాలు. |
| హిందీ | पौधे लगाओ | ఒక మొక్క నాటాను | ఒక మొక్క నాటి, వారానికి ఒక ఫోటో లేదా బొమ్మ, పక్కన ఒక హిందీ వాక్యం — నాలుగు వారాలు. |
| ఇంగ్లిష్ | The Raven and the Fox | The story in six pictures | కథను ఆరు గళ్లలో బొమ్మలుగా గీసి, ఒక్కో గడికి ఒక ఇంగ్లిష్ వాక్యం. |
| గణితం | Patterns in Mathematics | నా చుట్టూ నమూనాలు | రంగవల్లి, చీర అంచు, ఇటుకల పేర్పు — మూడు నమూనాలు గీసి, ప్రతిదానిలో పునరావృతమయ్యే భాగం గుర్తించండి. |
| సైన్స్ | Diversity in the Living World | మా వీధిలోని జీవ వైవిధ్యం | మీ వీధిలో పది మొక్కలు, పది జంతువుల పేర్లు రాయండి. మొక్కలను గుల్మాలు, పొదలు, వృక్షాలుగా; జంతువులను అవి ఉండే చోటును బట్టి విభజించి పట్టిక వేయండి. |
మంచి ప్రాజెక్ట్ — ఆరు భాగాలు
ఏ సబ్జెక్ట్ అయినా, ఏ తరగతి అయినా ఈ క్రమం పాటిస్తే మార్కులు నిలుస్తాయి.
| భాగం | ఏమి రాయాలి |
|---|---|
| 1. శీర్షిక పేజీ | ప్రాజెక్ట్ పేరు, విద్యార్థి పేరు, తరగతి, సెక్షన్, రోల్ నంబర్, పాఠశాల పేరు |
| 2. ఉద్దేశం | ఈ ప్రాజెక్ట్ ఎందుకు చేస్తున్నారో రెండు మూడు వాక్యాలు. ఏ పాఠానికి సంబంధించినదో పేరుతో సహా రాయండి |
| 3. సేకరించిన సమాచారం | మీరు చూసినది, అడిగినది, లెక్కించినది. ఇదే ప్రాజెక్ట్ గుండె |
| 4. పట్టిక లేదా బొమ్మ | సేకరించిన సమాచారాన్ని పట్టికగా, కమ్మీ చిత్రంగా, పటంగా చూపడం. చేతితో గీస్తే మంచిది |
| 5. నేను గ్రహించినది | ఈ పని వల్ల కొత్తగా తెలిసినది మీ సొంత మాటల్లో నాలుగైదు వాక్యాలు |
| 6. ఉపాధ్యాయుల సంతకం | చివరి పేజీలో ఖాళీ స్థలం |
మార్కులు ఎక్కడ పోతాయి
ఎక్కువమంది మార్కులు కోల్పోయేది విషయం తెలియక కాదు — ఈ నాలుగు కారణాల వల్ల.
| పొరపాటు | ఎందుకు మార్కులు పోతాయి |
|---|---|
| సిలబస్‌లో లేని పాఠం | FA2 అంటే ఆగస్టు, సెప్టెంబర్ పాఠాలు. వేరే పాఠం మీద ఎంత బాగా చేసినా అది FA2 కి పరిగణించరు |
| సొంత సమాచారం లేకపోవడం | ఇంటర్నెట్ నుంచి దించిన పేజీలు మాత్రమే ఉంటే “సేకరించిన సమాచారం” భాగం ఖాళీగా ఉన్నట్టే |
| గ్రహించినది రాయకపోవడం | సమాచారం ఇచ్చి ఆపేస్తే సగం ప్రాజెక్టే. ఏం నేర్చుకున్నారో మీ మాటల్లో ఉండాలి |
| ఆలస్యంగా ఇవ్వడం | ప్రాజెక్ట్ మార్కులు విడిగా ఉంటాయి. ఇవ్వకపోతే అవి పూర్తిగా పోతాయి, రాత పరీక్ష వాటిని తిరిగి ఇవ్వదు |
FA2 కి సంబంధించిన మిగిలిన పేజీలు
పరీక్ష తేదీలు, మార్కుల విధానం, అన్ని తరగతుల సమాచారం AP FA2 2026-27 పూర్తి సమాచారం పేజీలో. సబ్జెక్ట్ వారీ సిలబస్ AP FA2 Syllabus 2026-27 Class 6 to 10 పేజీలో ఉంది.
సాధన ప్రశ్నపత్రాలు జవాబులతో — AP FA2 Question Papers Class 6 to 10, పదో తరగతికి ప్రత్యేకంగా AP 10th Class FA2 Question Papers 2026-27. నమూనా పత్రాలు AP FA2 Model Question Papers 6th to 10th Class పేజీలో.
తరగతి వారీ సిలబస్ — ఆరో తరగతి FA2 సిలబస్, ఏడో తరగతి FA2 సిలబస్, ఎనిమిదో తరగతి FA2 సిలబస్, తొమ్మిదో తరగతి FA2 సిలబస్ పేజీల్లో.
ఒకటి నుంచి ఐదు తరగతుల ప్రాజెక్ట్ అంశాలు FA2 Project Works Class 1 to 5 పేజీలో విడిగా ఉన్నాయి. FA1 ఇంగ్లిష్ ప్రాజెక్ట్ అంశాలు AP FA1 English Project Work 2026-27 పేజీలో.
FAQs
FA2 ప్రాజెక్ట్ వర్క్ ఎప్పుడు ఇవ్వాలి?
రాత పరీక్ష కంటే ముందే. ప్రాజెక్ట్ అనేది వేరే సాధనం — పరీక్ష రోజున ఇచ్చేది కాదు. ఖచ్చితమైన తేదీ ఉపాధ్యాయులు చెబుతారు, సాధారణంగా పరీక్షలకు వారం ముందు.
ప్రాజెక్ట్ వర్క్‌కు ఎన్ని మార్కులు?
FA2 లో ప్రాజెక్ట్ వర్క్‌కు 5 మార్కులు — FA మొత్తం 50 లో. రాత పరీక్ష 35, నోట్‌బుక్ 5, తరగతి భాగస్వామ్యం 5 మిగిలినవి. ఏ సాధనానికి ఎన్ని అనేది ఏటా మారవచ్చు — మీ పాఠశాల ఉపాధ్యాయులను అడిగి నిర్ధారించుకోండి.
ఏ పాఠం మీద ప్రాజెక్ట్ చేయాలి?
ఆగస్టు, సెప్టెంబర్‌లో బోధించిన పాఠాల మీదే. FA2 సిలబస్ అవే. ఈ పేజీలో ప్రతి తరగతికీ ఆ పాఠాల పేర్లతో సహా ప్రాజెక్ట్ అంశాలు ఇచ్చాం — సిలబస్‌లో లేని పాఠం మీద చేస్తే శ్రమ వృథా.
ఇంటర్నెట్ నుంచి కాపీ చేసి ఇవ్వవచ్చా?
ఇవ్వవచ్చు, కానీ మార్కులు రావు. ఉపాధ్యాయులు ఒకే రకమైన ప్రాజెక్టులు వరుసగా చూస్తారు, కాపీ వెంటనే తెలిసిపోతుంది. ఈ పేజీలోని అంశాలన్నీ మీ ఇల్లు, మీ ఊరు, మీ తరగతి నుంచి సమాచారం సేకరించేవి — అందుకే ఒక్కొక్కరిదీ వేరుగా ఉంటుంది.
ప్రాజెక్ట్ ఎన్ని పేజీలు ఉండాలి?
పేజీల సంఖ్య కంటే విషయం ముఖ్యం. ఆరు నుంచి పది తరగతులకు మూడు నుంచి ఐదు పేజీలు సరిపోతాయి. ఇరవై పేజీలు నింపి, అందులో మీరు రాసినది రెండు పేజీలే ఉంటే అది తక్కువ మార్కులే తెస్తుంది.
చేతిరాతా, ప్రింటా?
చేతిరాత మేలు — ముఖ్యంగా భాషా సబ్జెక్టుల్లో. బొమ్మలు, పటాలు కూడా చేతితో గీస్తే శ్రమ కనిపిస్తుంది. ప్రింట్ చేసినది పైన పైన కాపీలా అనిపిస్తుంది.
ప్రాజెక్ట్‌లో ఏమేమి ఉండాలి?
శీర్షిక పేజీ, ఉద్దేశం, సేకరించిన సమాచారం, పట్టిక లేదా బొమ్మ, మీరు గ్రహించినది, చివర ఉపాధ్యాయుల సంతకానికి ఖాళీ. ఆరు భాగాలు — ఈ పేజీలో వివరంగా ఇచ్చాం.
తల్లిదండ్రులు ఎంత సహాయం చేయాలి?
సమాచారం సేకరించడంలో, బయటికి తీసుకెళ్లడంలో సహాయం చేయవచ్చు. కానీ రాయడం, గీయడం పిల్లలే చేయాలి. పెద్దవాళ్ల చేతిరాత ఉపాధ్యాయులకు వెంటనే తెలుస్తుంది.
ప్రాథమిక తరగతులకు ప్రాజెక్ట్ ఉంటుందా?
ఉంటుంది, కానీ చాలా సరళంగా. ఒకటి నుంచి ఐదు తరగతుల అంశాలు FA2 Project Works Class 1 to 5 పేజీలో విడిగా ఇచ్చాం.
ఒకే ప్రాజెక్ట్ అన్ని సబ్జెక్టులకు ఇవ్వవచ్చా?
కుదరదు. ప్రతి సబ్జెక్ట్‌కూ విడిగా ఇవ్వాలి, ఎందుకంటే ఒక్కో సబ్జెక్ట్ ఉపాధ్యాయుడు విడిగా మార్కులు వేస్తారు. అయితే ఒకే సమాచార సేకరణను రెండు సబ్జెక్టులకు వేర్వేరుగా వాడుకోవచ్చు — ఉదాహరణకు ఊరి నీటి సర్వేను సాంఘికానికీ, గణితానికీ (సగటు లెక్కించి) వాడవచ్చు.
రాత పరీక్షకు కూడా సిద్ధం కావాలి కదా?
అవును. సాధన ప్రశ్నపత్రాలు, జవాబులు AP FA2 Question Papers Class 6 to 10 పేజీలో ఉన్నాయి. సిలబస్ AP FA2 Syllabus Class 6 to 10 పేజీలో.
గత సంవత్సరం ప్రాజెక్ట్ ఫైళ్లు ఇక్కడ ఎందుకు లేవు?
ఇంతకుముందు ఈ పేజీలో వేరేవాళ్ల Drive ఫైళ్లకు లింకులు ఉండేవి — వాటిలో చాలావి 2018, 2019 నాటివి, కొన్ని వేరే విద్యా సైట్ల ముద్రతో. పాత సంవత్సరపు, వేరేవాళ్ల ప్రాజెక్టును కాపీ చేయడం కంటే ఈ ఏడాది సిలబస్ పాఠం మీద సొంతంగా చేయడం మేలు — అందుకే వాటి స్థానంలో పాఠాల వారీ అంశాలు ఇచ్చాం.
FA1 ప్రాజెక్ట్ అంశాలు ఎక్కడ?
AP FA1 English Project Work 2026-27 పేజీలో ఇంగ్లిష్ ప్రాజెక్ట్ అంశాలు, ఫార్మాట్ గైడ్ ఉన్నాయి.
ప్రాజెక్ట్ ఆలస్యంగా ఇస్తే ఏమవుతుంది?
మార్కులు తగ్గుతాయి, కొన్ని చోట్ల అస్సలు తీసుకోరు. ప్రాజెక్ట్ వర్క్‌కు ప్రత్యేక మార్కులు ఉన్నాయి కాబట్టి, ఇవ్వకపోతే ఆ మార్కులు పూర్తిగా పోతాయి — రాత పరీక్షలో ఎంత బాగా రాసినా అవి తిరిగి రావు.
Official Sources
FA2 అనేది AP పాఠశాల విద్యాశాఖ, Commissioner of School Education, Andhra Pradesh నిర్వహించే నిర్మాణాత్మక మూల్యాంకనం. పాఠ్యపుస్తకాలు CSE AP Textbooks Download పేజీలో ఉన్నాయి.
ఈ పేజీలోని ప్రాజెక్ట్ అంశాలు మా సొంతం — ప్రతి తరగతి FA2 సిలబస్ పాఠాల ఆధారంగా తయారుచేసినవి. ఇవి నమూనాలు మాత్రమే; మీ ఉపాధ్యాయులు వేరే అంశం ఇస్తే అదే చేయాలి.
మార్కుల విభజన, సమర్పణ తేదీలు పాఠశాల స్థాయిలో మారవచ్చు. మీ పాఠశాల ఇచ్చే సూచనే చివరి ప్రామాణికం.