AP NMMS 2026 (National Means-cum-Merit Scholarship) పరీక్ష 29 నవంబర్ 2026 (ఆదివారం) ఉదయం 10:00 నుంచి మధ్యాహ్నం 1:00 వరకు జరుగుతుంది. మొదట 15 నవంబర్ అని ప్రకటించిన తేదీని ప్రభుత్వ పరీక్షల సంచాలకుల కార్యాలయం 29 నవంబర్‌కు మార్చింది. 8వ తరగతి విద్యార్థులు ఈ పరీక్షలో ఎంపికైతే 9 నుంచి 12వ తరగతి వరకు ఏటా ₹12,000 స్కాలర్‌షిప్ వస్తుంది.
ఈ పేజీలో ప్రభుత్వ పరీక్షల సంచాలకుల అధికారిక నోటిఫికేషన్ (Rc.No.208/NMMSS/2026), 30-10-2026 నాటి గడువు పొడిగింపు ఉత్తర్వు, 31-10-2026 పత్రికా ప్రకటన చదివి ఇచ్చిన వివరాలు ఉన్నాయి: పరీక్ష తేదీ, కొత్త గడువులు, అర్హత, ఫీజు, సిలబస్, పరీక్ష విధానం, హాల్ టికెట్. దానితో పాటు డిసెంబర్ 2025 అసలు NMMS ప్రశ్నపత్రంలోని 31 ప్రశ్నలు, బోర్డ్ విడుదల చేసిన అధికారిక Final Key జవాబులతో — స్కోర్ బార్‌తో.
NMMS హాల్ టికెట్లు, Initial Key వచ్చిన వెంటనే తెలియాలంటే WhatsApp గ్రూప్‌లో చేరండి
ఈ పేజీలో: ముఖ్య వివరాలు | గడువు తేదీలు | అర్హత | పరీక్ష విధానం | హాల్ టికెట్ | 2025 ప్రశ్నలు + Key | స్కాలర్‌షిప్ | FAQs
AP NMMS 2026 — ముఖ్య వివరాలు
| అంశం | వివరం |
|---|---|
| పరీక్ష | National Means-cum-Merit Scholarship Scheme Examination — 8వ తరగతి విద్యార్థులకు |
| నిర్వహణ | ప్రభుత్వ పరీక్షల సంచాలకుల కార్యాలయం (Directorate of Government Examinations), ఆంధ్రప్రదేశ్ |
| పరీక్ష తేదీ | 29-11-2026 (ఆదివారం), ఉదయం 10:00 నుంచి మధ్యాహ్నం 1:00 వరకు |
| మొదటి తేదీ | 15-11-2026 (10-09-2026 నోటిఫికేషన్‌లో) — తర్వాత 29-11-2026 కి మార్చారు |
| మాధ్యమాలు | తెలుగు, ఇంగ్లీష్, ఉర్దూ |
| పరీక్ష కేంద్రాలు | రాష్ట్రంలోని 28 జిల్లాల్లో అన్ని రెవెన్యూ డివిజనల్ ప్రధాన కేంద్రాలు |
| దరఖాస్తు | ఆన్‌లైన్‌లో మాత్రమే — పాఠశాల ప్రధానోపాధ్యాయులు bse.ap.gov.in లో అప్‌లోడ్ చేస్తారు |
| ఫీజు | OC, BC: ₹100; SC, ST: ₹50 — SBI Collect ద్వారా మాత్రమే (DD తీసుకోరు) |
| అధికారిక వెబ్‌సైట్ | www.bse.ap.gov.in |
AP NMMS 2026 కొత్త గడువు తేదీలు (30-10-2026 ఉత్తర్వు)
మొదటి నోటిఫికేషన్‌లోని గడువులు ముగిసిన తర్వాత ప్రభుత్వం మళ్ళీ పొడిగించింది. అర్హత, సిలబస్, ఫీజు మారలేదని ఉత్తర్వులోనే స్పష్టం చేశారు.
| పని | మొదటి గడువు | పొడిగించిన గడువు |
|---|---|---|
| ప్రధానోపాధ్యాయులు దరఖాస్తు అప్‌లోడ్ చేయడానికి చివరి తేదీ | 12-10-2026 | 06-11-2026 |
| పరీక్ష ఫీజు చెల్లింపు చివరి తేదీ | 13-10-2026 | 07-11-2026 |
| ప్రింట్ చేసిన నామినల్ రోల్స్ జిల్లా విద్యాశాఖాధికారి కార్యాలయంలో అందజేయడం | 14-10-2026 | 09-11-2026 |
| DEO లాగిన్‌లో దరఖాస్తుల ఆమోదం | 16-10-2026 | 11-11-2026 |
విద్యార్థి స్వయంగా దరఖాస్తు చేయలేడు; తన పాఠశాల ప్రధానోపాధ్యాయుల ద్వారానే. దరఖాస్తు సరిగ్గా అప్‌లోడ్ అయిందో, ఫీజు చెల్లించారో మీ ప్రధానోపాధ్యాయులను అడిగి నిర్ధారించుకోండి.
AP NMMS 2026 అర్హత
- చదువుతున్న పాఠశాల: ప్రభుత్వ, స్థానిక సంస్థల (జిల్లా పరిషత్ / మున్సిపల్), ప్రభుత్వ ఎయిడెడ్, AP మోడల్ స్కూల్ (డే స్కాలర్స్ మాత్రమే), 8వ తరగతి నడుస్తున్న MPUP పాఠశాలలు మాత్రమే. ప్రైవేట్ పాఠశాలల విద్యార్థులు అర్హులు కాదు.
- 7వ తరగతి మార్కులు (2025-26): OC, BC లకు కనీసం 55%; SC, ST లకు కనీసం 50%; లేదా అన్ని వర్గాలకూ B+ గ్రేడ్.
- కుటుంబ ఆదాయం: తల్లిదండ్రుల ఇద్దరి వార్షిక ఆదాయం అన్ని మార్గాల నుంచి కలిపి ₹3,50,000 కంటే తక్కువ. MRO ఇచ్చిన తాజా ఆదాయ ధ్రువపత్రం కావాలి.
- కుల ధ్రువపత్రం: ఆదాయ, కుల ధ్రువపత్రాలు ప్రధానోపాధ్యాయులకు ఇవ్వాలి. SC విద్యార్థుల ధ్రువపత్రంలో SC Group 1 / 2 / 3 ఉండాలి.
సిలబస్: 7వ తరగతి (2025-26) పాఠాలు మొత్తం, 8వ తరగతి (2026-27) అక్టోబర్ వరకు బోధించిన పాఠాలు. 8వ తరగతి పాఠాలకు AP Board Solutions Class 8, SA1 సాధనకు AP 8th Class SA1 Maths Question Paper ఉపయోగపడతాయి.
AP NMMS పరీక్ష విధానం — MAT, SAT
డిసెంబర్ 2025 అసలు ప్రశ్నపత్రం (తెలుగు మాధ్యమం) ప్రకారం పరీక్షలో రెండు భాగాలు. అన్ని ప్రశ్నలూ బహుళైచ్ఛికం (నాలుగు ఆప్షన్లు), ప్రతి ప్రశ్నకు ఒక మార్కు. జవాబులు OMR షీట్‌లో నీలం లేదా నలుపు బాల్ పాయింట్ పెన్‌తో నింపాలి. ప్రశ్నపత్రం 32 పేజీలు.
| భాగం | ప్రశ్నలు | మార్కులు | సమయం |
|---|---|---|---|
| Part-I: Mental Ability Test (MAT) — మానసిక సామర్థ్యం | 90 | 90 | 90 నిమిషాలు |
| Part-II: Scholastic Aptitude Test (SAT) — విషయ పరిజ్ఞానం | 90 | 90 | 90 నిమిషాలు |
| మొత్తం | 180 | 180 | 3 గంటలు |
SAT లో సబ్జెక్టుల వారీ ప్రశ్నలు (2025 పేపర్ ప్రకారం)
| సబ్జెక్టు | ప్రశ్న సంఖ్యలు | మార్కులు |
|---|---|---|
| భౌతిక శాస్త్రం (Physics) | 91–102 | 12 |
| రసాయన శాస్త్రం (Chemistry) | 103–113 | 11 |
| జీవ శాస్త్రం (Biology) | 114–125 | 12 |
| గణితం (Mathematics) | 126–145 | 20 |
| చరిత్ర (History) | 146–155 | 10 |
| భూగోళం (Geography) | 156–165 | 10 |
| పౌరశాస్త్రం (Political Science) | 166–175 | 10 |
| అర్థశాస్త్రం (Economics) | 176–180 | 5 |
MAT లో వచ్చే ప్రశ్నల రకాలు (2025 పేపర్): సంఖ్యా శ్రేణులు, సంఖ్యా సమాసాల సూక్ష్మీకరణ, అక్షర శ్రేణులు, కోడింగ్–డీకోడింగ్, బొమ్మల శ్రేణి, అద్దం / నీటి ప్రతిబింబాలు, దాగిన బొమ్మలు, పట్టిక / చిత్రంలో తప్పిపోయిన సంఖ్య, బొమ్మల వర్గీకరణ. బొమ్మల ప్రశ్నలు ఎక్కువ కాబట్టి గత ప్రశ్నపత్రాల సాధనే ముఖ్యం.
180 ప్రశ్నలకు 180 నిమిషాలు — సగటున ఒక ప్రశ్నకు ఒక నిమిషం. తెలియని ప్రశ్న దగ్గర ఆగకుండా ముందుకు వెళ్ళి, చివర్లో తిరిగి రావాలని ప్రశ్నపత్రం సూచనల్లోనే ఉంది. SAT లో గణితానికి 20 ప్రశ్నలు — ఒక్క సబ్జెక్టుకు ఇవే ఎక్కువ.
AP NMMS Hall Ticket 2026
6 నవంబర్ 2026 నాటికి హాల్ టికెట్లు విడుదల కాలేదు. bse.ap.gov.in లోని NMMS విభాగంలో ఇప్పుడు ఉన్నవి: “NMMS 2026 – Online Application”, “Notification”, “Extension of Due Dates”, “Press Note”. హాల్ టికెట్లు వచ్చాక అదే విభాగంలో, లేదా ప్రధాన పేజీలోని Student Services లోని Hall Tickets లో లింక్ వస్తుంది. DEO ఆమోదం (11-11-2026) తర్వాతే హాల్ టికెట్లు వచ్చే అవకాశం ఉంది. వచ్చిన రోజే ఈ పేజీలో డౌన్‌లోడ్ విధానం కలుపుతాం.
అధికారిక వెబ్‌సైట్: bse.ap.gov.in (ప్రభుత్వ పరీక్షల సంచాలకులు, AP)
AP NMMS 2025 ప్రశ్నపత్రం — 31 ప్రశ్నలు, అధికారిక జవాబులతో
డిసెంబర్ 2025 లో జరిగిన AP NMMS పరీక్ష తెలుగు మాధ్యమం Set-A ప్రశ్నపత్రంలోని SAT భాగం నుంచి 31 ప్రశ్నలు ఇవి. ప్రశ్న సంఖ్యలు అసలు పేపర్‌లోనివే. జవాబులు ప్రభుత్వ పరీక్షల సంచాలకులు 23-12-2025 న విడుదల చేసిన Final Key (Set-A) నుంచి. Set-B, C, D ల్లో ప్రశ్నల క్రమం వేరు కాబట్టి ఈ జవాబు సంఖ్యలు Set-A కి మాత్రమే. ముందు మీరే జవాబు ఆలోచించి, తర్వాత “జవాబు చూడండి” నొక్కండి; సరిపోతే టిక్ పెట్టండి.
భౌతిక శాస్త్రం
91. ఒక సీసా నీటితో నింపబడింది. సీసా అడుగుభాగం నుంచి వేర్వేరు ఎత్తుల్లో నాలుగు రంధ్రాలు ఉన్నాయి — A అన్నిటికంటే పైన, B, D ఒకే ఎత్తులో, C అన్నిటికంటే కింద. కింది వాటిలో ఏ వాక్యం సరియైనది కాదు?
(1) రంధ్రం C వద్ద పీడనం గరిష్ఠంగా ఉంటుంది (2) రంధ్రం B మరియు D ఒకే పీడనం కలిగి ఉంటాయి (3) రంధ్రం C మరియు D ఒకే పీడనం కలిగి ఉంటాయి (4) రంధ్రం A వద్ద అత్యల్ప పీడనం ఉంటుంది
జవాబు చూడండి
ద్రవ పీడనం లోతు పెరిగే కొద్దీ పెరుగుతుంది. C, D వేర్వేరు లోతుల్లో ఉన్నాయి కాబట్టి వాటి పీడనం సమానం కాదు.
92. ఈ క్రింది వానిలో ఏ బలం వలన వర్షం భూమిపైన పడుతుంది?
(1) అయస్కాంత బలం (2) ఘర్షణ బలం (3) కండర బలం (4) గురుత్వాకర్షణ బలం
జవాబు చూడండి
93. ఒక స్ప్రింగ్ త్రాసు కొలిచేది ఏమిటి?
(1) కాలం (2) బలం (3) దూరం (4) ఘనపరిమాణం
జవాబు చూడండి
స్ప్రింగ్ త్రాసు వస్తువుపై పనిచేసే బలాన్ని (బరువును) కొలుస్తుంది.
96. ఒక చిరుత పులి 108 km/hr వడితో పరిగెడుతుంది. దాని వడిని మీ./సె. లలో కనుక్కోండి.
(1) 30 (2) 33.33 (3) 40 (4) 108
జవాబు చూడండి
108 × 1000 ÷ 3600 = 30 మీ./సె.
97. ఒక వస్తువు దూరం–కాలం గ్రాఫ్ మూలబిందువు నుంచి సరళరేఖగా ఉంది: 1, 2, 3, 4, 5 నిమిషాలకు దూరం వరుసగా 1, 2, 3, 4, 5 కి.మీ. ఈ గ్రాఫ్‌కు సంబంధించి ఏది సరియైనది కాదు?
(1) వస్తువు వడి 16.66 మీ./సె. (2) వస్తువు అసమ చలనంలో ఉంది (3) వస్తువు చలనం నిశ్చలస్థితి నుంచి ప్రారంభమైనది (4) వస్తువు స్థిరవేగంతో చలిస్తోంది
జవాబు చూడండి
ప్రతి నిమిషానికి సమాన దూరం (1 కి.మీ.) — ఇది సమ చలనం, అసమ చలనం కాదు. 1000 మీ. ÷ 60 సె. = 16.66 మీ./సె.
98. ఒక లోలకం 20 డోలనాలను 41 సెకనులలో పూర్తి చేసింది. దాని డోలనావర్తన కాలం ఎంత?
(1) 2.5 సెకన్లు (2) 2.05 సెకన్లు (3) 2.1 సెకన్లు (4) 2 సెకన్లు
జవాబు చూడండి
41 ÷ 20 = 2.05 సెకన్లు.
99. విద్యుత్ యొక్క ______ ఆధారంగా విద్యుత్ గంట పనిచేస్తుంది.
(1) అయస్కాంత ఫలితం (2) ఉష్ణ ఫలితం (3) రసాయన ఫలితం (4) కాంతి ఫలితం
జవాబు చూడండి
102. కింది వాటిలో ఏ ఆంగ్ల అక్షరం ఎటువంటి మార్పు లేకుండా బయట కనిపించిన విధంగానే సమతల దర్పణంలో ప్రతిబింబాన్ని ఏర్పరుస్తుంది?
(1) L (2) S (3) P (4) M
జవాబు చూడండి
M నిలువు అక్షం చుట్టూ సౌష్ఠవం కలది కాబట్టి పార్శ్వ విలోమం జరిగినా అలాగే కనిపిస్తుంది.
రసాయన శాస్త్రం
103. జతపరచండి: క్షారము — లభ్యమయ్యే పదార్థం. i) కాల్షియం హైడ్రాక్సైడ్ ii) అమ్మోనియం హైడ్రాక్సైడ్ iii) సోడియం హైడ్రాక్సైడ్ — a) సబ్బు b) సున్నపు నీరు c) విండో క్లీనర్
(1) i-(a), ii-(b), iii-(c) (2) i-(c), ii-(b), iii-(a) (3) i-(b), ii-(c), iii-(a) (4) i-(a), ii-(c), iii-(b)
జవాబు చూడండి
104. పదార్థం X ఎర్ర లిట్మస్‌ను నీలి రంగులోకి, Y నీలి లిట్మస్‌ను ఎరుపులోకి మార్చును. Z రెండింటి రంగులనూ మార్చదు. X, Y, Z స్వభావం?
(1) X ఆమ్లం, Y క్షారం, Z తటస్థం (2) X తటస్థం, Y ఆమ్లం, Z క్షారం (3) X క్షారం, Y తటస్థం, Z ఆమ్లం (4) X క్షారం, Y ఆమ్లం, Z తటస్థం
జవాబు చూడండి
105. అజీర్తి నుండి ఉపశమనం పొందడానికి ఉపయోగించే యాంటాసిడ్ స్వభావం
(1) ఆమ్లత్వం (2) క్షారత్వం (3) తటస్థం (4) ఆమ్లత్వం మరియు క్షారత్వం
జవాబు చూడండి
జీర్ణాశయంలోని అధిక ఆమ్లాన్ని తటస్థీకరించడానికి క్షార స్వభావం గల యాంటాసిడ్ వాడతారు.
106. వెనిగర్‌ను బేకింగ్ సోడాకు కలిపినప్పుడు వెలువడే వాయువు ఏది?
(1) SO₂ (2) H₂S (3) NO₂ (4) CO₂
జవాబు చూడండి
107. కింది వానిలో స్టెయిన్‌లెస్ స్టీల్ తయారీలో ఉపయోగించని లోహం
(1) క్రోమియం (2) జింక్ (3) నికెల్ (4) మాంగనీస్
జవాబు చూడండి
108. పరికల్పన (A): ఓజోన్ పొర హానికరమైన అతినీలలోహిత వికిరణం నుండి మనలను రక్షిస్తుంది. కారణం (R): ఓజోన్ అతినీలలోహిత కిరణాలను గ్రహించి ఆక్సిజన్‌గా విచ్ఛిన్నమవుతుంది.
(1) (A), (R) సత్యములు; (R), (A) కు సరియైన వివరణ (2) (A), (R) సత్యములు; (R), (A) కు సరియైన వివరణ కాదు (3) (A) సత్యము, (R) అసత్యము (4) (A) అసత్యము, (R) సత్యము
జవాబు చూడండి
110. పెయింట్స్ తయారీలో ఉపయోగించే పెట్రోలియం అంశీభూతము ఏది?
(1) పెట్రోలు (2) కిరోసిన్ (3) పారాఫిన్ మైనం (4) బిటుమెన్
జవాబు చూడండి
112. తగరపు డబ్బాల విషయంలో సరైనది ఏది? a) తగరపు డబ్బాలు ఆహారాన్ని నిల్వచేయుటకు ఉపయోగిస్తారు. b) తగరంపై ఇనుప పూత పూయడం వలన తయారవుతాయి. c) ఇనుము కంటే తగరము తక్కువ చర్యాశీలత కలది.
(1) (a) మాత్రమే (2) (b) మాత్రమే (3) (a) మరియు (b) (4) (a) మరియు (c)
జవాబు చూడండి
(b) తప్పు — తగరపు డబ్బాలు ఇనుముపై తగరం పూత పూసి తయారుచేస్తారు, తిరగబడి కాదు.
113. బ్యాటరీ, అయస్కాంత సూచి (దిక్సూచి), రెండు ఎలక్ట్రోడ్లు ముంచిన ద్రావణం కలిగిన వలయంలో ఏ ద్రావణం అయస్కాంత సూచిలో అపవర్తనం కలుగజేస్తుంది?
(1) తేనె (2) వెనిగర్ (3) కిరోసిన్ (4) ఆల్కహాల్
జవాబు చూడండి
వెనిగర్ (ఎసిటిక్ ఆమ్లం) విద్యుత్ వాహకం; వలయంలో విద్యుత్ ప్రవహించి సూచి కదులుతుంది.
జీవ శాస్త్రం
114. గ్లూకోజ్ ఆక్సిజన్ సమక్షంలో (A) + నీరు + శక్తిగా; ఆక్సిజన్ లేనప్పుడు ఈస్ట్‌లో (B) + కార్బన్‌డయాక్సైడ్ + శక్తిగా; కండరకణంలో (C) + శక్తిగా మారుతుంది. A, B, C లు?
(1) (A) లాక్టిక్ ఆమ్లం, (B) నీరు, (C) ఆల్కహాల్ (2) (A) కార్బన్‌డయాక్సైడ్, (B) నీరు, (C) లాక్టిక్ ఆమ్లం (3) (A) ఆల్కహాల్, (B) లాక్టిక్ ఆమ్లం, (C) నీరు (4) (A) కార్బన్‌డయాక్సైడ్, (B) ఆల్కహాల్, (C) లాక్టిక్ ఆమ్లం
జవాబు చూడండి
115. ‘ORS’ ను విస్తరించుము.
(1) ఓరల్ రిహైడ్రేషన్ సొల్యూషన్ (2) ఓరల్ రిహైడ్రేషన్ సాల్ట్ (3) ఓరల్ రెమిడి సొల్యూషన్ (4) ఓరల్ రికవరీ సొల్యూషన్
జవాబు చూడండి
117. ప్రకటన (A): సూక్ష్మజీవ నాశకాలను వ్యాధులకు చికిత్స చేయడం కోసం వాడుతారు. వివరణ (R): సూక్ష్మజీవనాశకాలు బ్యాక్టీరియా మరియు వైరస్‌లను చంపివేయగలవు.
(1) (A), (R) సరైనవి; (R), (A) కు సరియైన వివరణ (2) (A), (R) సరైనవి; (R), (A) కు సరియైన వివరణ కాదు (3) (A) సరియైనది, (R) సరియైనది కాదు (4) (A) సరియైనది కాదు, (R) సరియైనది
జవాబు చూడండి
యాంటీబయాటిక్స్ బ్యాక్టీరియాపై పనిచేస్తాయి, వైరస్‌లపై పనిచేయవు. అందుకే (R) తప్పు.
120. కింది వానిలో ఏకలింగ పుష్పాలు
(1) మొక్కజొన్న, ఆవాలు, బొప్పాయి (2) ఆవాలు, గులాబి, పెట్యూనియా (3) బొప్పాయి, దోసకాయ, పెట్యూనియా (4) దోసకాయ, మొక్కజొన్న, బొప్పాయి
జవాబు చూడండి
గణితం
126. √(5 + √(11 + √(19 + √(29 + √49)))) విలువ
(1) 3 (2) 2 (3) 4 (4) 6
జవాబు చూడండి
లోపలి నుంచి: √49 = 7; 29+7 = 36, √36 = 6; 19+6 = 25, √25 = 5; 11+5 = 16, √16 = 4; 5+4 = 9, √9 = 3.
127. 17 కంటే ఎక్కువ కాని అన్ని ప్రధాన సంఖ్యల మొత్తము ఎంత?
(1) 59 (2) 42 (3) 41 (4) 58
జవాబు చూడండి
2 + 3 + 5 + 7 + 11 + 13 + 17 = 58.
128. ఒక దీర్ఘచతురస్రం పొడవు, దాని వెడల్పు కంటే 7 మీ. ఎక్కువ. చుట్టుకొలత 234 మీ. అయిన దాని పొడవు ఎంత?
(1) 55 మీ. (2) 62 మీ. (3) 48 మీ. (4) 42 మీ.
జవాబు చూడండి
2(l + l − 7) = 234 ⇒ 2l − 7 = 117 ⇒ l = 62 మీ.
129. వరుస రాయితీలు 50 శాతం మరియు 50 శాతం ఇవ్వడం అనేది సమానమైన రాయితీ ఎంతకు సమానం?
(1) 100% (2) 50% (3) 75% (4) 25%
జవాబు చూడండి
₹100 పై 50% ⇒ ₹50; దానిపై మళ్ళీ 50% ⇒ ₹25. మొత్తం రాయితీ ₹75, అంటే 75%.
130. 1² + 2² + 3² + … + 10² యొక్క సరాసరి
(1) 46.5 (2) 50.5 (3) 38.5 (4) 42.5
జవాబు చూడండి
మొత్తం = 10 × 11 × 21 ÷ 6 = 385; సరాసరి = 385 ÷ 10 = 38.5.
131. కొంత సొమ్ము 15 సంవత్సరాల కాలంలో రెట్టింపు అయిన సంవత్సరానికి వడ్డీరేటు శాతము ఎంత? (సాధారణ వడ్డీ)
(1) 6 3/2 (2) 6 2/3 (3) 6 1/2 (4) 6
జవాబు చూడండి
వడ్డీ = అసలు; 100 = 100 × R × 15 ÷ 100 ⇒ R = 100/15 = 6 2/3 %.
132. ఒక సమబాహు త్రిభుజ భుజము పొడవును పెంచగా ఏర్పడే బాహ్యకోణము
(1) 60° (2) 90° (3) 180° (4) 120°
జవాబు చూడండి
180° − 60° = 120°.
133. 100 మీ² వైశాల్యము గల చతురస్రంలో ఉంచదగిన అతిపెద్ద కర్ర పొడవు
(1) 1.41 మీ. (2) 1.234 మీ. (3) 12.34 మీ. (4) 14.14 మీ.
జవాబు చూడండి
భుజం 10 మీ.; అతిపెద్ద కర్ర = కర్ణం = 10√2 ≈ 14.14 మీ.
134. ఒక వృత్త వైశాల్యము 38.5 చ.మీ., దాని పరిధి ఎంత?
(1) 22 మీ. (2) 11 మీ. (3) 6.20 మీ. (4) 77 మీ.
జవాబు చూడండి
πr² = 38.5 ⇒ r² = 12.25 ⇒ r = 3.5; పరిధి = 2 × 22/7 × 3.5 = 22 మీ.
135. √4096 = 64 అయిన √4096 + √40.96 + √0.004096 విలువ ఎంత?
(1) 70.400 (2) 70.464 (3) 71.104 (4) 71.400
జవాబు చూడండి
64 + 6.4 + 0.064 = 70.464.
కొన్ని ప్రశ్నలకు (ఉదా: Set-A లో 119, 162, 179) బోర్డ్ “Add Score” ఇచ్చింది — అంటే ఆ ప్రశ్నకు అందరికీ మార్కు కలిపారు. Set-A లో ప్రశ్న 144 కి ఇంగ్లీష్ మాధ్యమానికి జవాబు (1), తెలుగు మాధ్యమ విద్యార్థులకు మార్కు కలిపారు. ప్రశ్నపత్రంలో తప్పులు ఉంటే బోర్డ్ ఇలా సరిచేస్తుంది కాబట్టి Initial Key పై అభ్యంతరాలు ఉంటే గడువులోపే తెలపాలి.
NMMS స్కాలర్‌షిప్ ఎంత, ఎలా వస్తుంది
- ఇది కేంద్ర విద్యా మంత్రిత్వ శాఖ పథకం. ఎంపికైన విద్యార్థికి నెలకు ₹1,000, అంటే ఏటా ₹12,000, 9 నుంచి 12వ తరగతి వరకు నాలుగేళ్లు — మొత్తం ₹48,000.
- డబ్బు నేరుగా విద్యార్థి బ్యాంకు ఖాతాకు National Scholarship Portal (NSP) ద్వారా వస్తుంది. ఎంపికైన తర్వాత NSP లో దరఖాస్తు, ప్రతి ఏటా రెన్యువల్ చేయాలి.
- ప్రతి ఏడాది తర్వాతి తరగతికి ఉత్తీర్ణత, ప్రభుత్వ / ఎయిడెడ్ పాఠశాలలోనే చదువు కొనసాగించడం అవసరం.
NSP దరఖాస్తు విధానం NSP Scholarship 2026-27 for AP Students పేజీలో ఉంది.
తర్వాత ఏం చదవాలి
- AP 8th Class SA1 Maths Question Paper 2026-27 — SAT గణితానికి సాధన
- AP 8th Class SA1 Physical Science Question Paper — SAT సైన్స్ కి
- AP 8th Class SA1 Social Studies Question Paper — SAT సోషల్ కి
5వ తరగతి పిల్లలు ఉన్న కుటుంబాలకు: నవోదయ ప్రవేశ పరీక్ష 28 నవంబర్ — Navodaya Class 6 Admit Card 2027, పరీక్ష విధానం. 8వ తరగతి అన్ని సబ్జెక్టుల కోసం AP 8th Class Textbooks, Notes, Question Papers చూడండి.
AP NMMS 2026 — FAQs
AP NMMS 2026 పరీక్ష ఎప్పుడు?
29 నవంబర్ 2026 (ఆదివారం), ఉదయం 10:00 నుంచి మధ్యాహ్నం 1:00 వరకు. మొదట 15 నవంబర్ అని ప్రకటించారు; తర్వాత 29 నవంబర్‌కు మార్చారు.
AP NMMS 2026 దరఖాస్తు చివరి తేదీ ఏది?
30-10-2026 ఉత్తర్వు ప్రకారం ప్రధానోపాధ్యాయులు దరఖాస్తు అప్‌లోడ్ చేయడానికి చివరి తేదీ 06-11-2026, ఫీజు చెల్లింపుకు 07-11-2026, నామినల్ రోల్స్ DEO కార్యాలయంలో ఇవ్వడానికి 09-11-2026, DEO ఆమోదానికి 11-11-2026.
విద్యార్థి స్వయంగా ఆన్‌లైన్‌లో దరఖాస్తు చేయవచ్చా?
లేదు. దరఖాస్తులను పాఠశాల ప్రధానోపాధ్యాయులే bse.ap.gov.in లో అప్‌లోడ్ చేస్తారు.
NMMS కు ఎవరు అర్హులు?
ప్రభుత్వ, జిల్లా పరిషత్ / మున్సిపల్, ఎయిడెడ్, AP మోడల్ (డే స్కాలర్), MPUP పాఠశాలల్లో 8వ తరగతి చదువుతూ, 7వ తరగతిలో OC/BC 55%, SC/ST 50% (లేదా B+ గ్రేడ్) పొంది, తల్లిదండ్రుల వార్షిక ఆదాయం ₹3,50,000 లోపు ఉన్నవారు.
ప్రైవేట్ పాఠశాల విద్యార్థులు NMMS రాయవచ్చా?
రాయలేరు. నోటిఫికేషన్‌లో పేర్కొన్న ప్రభుత్వ, స్థానిక సంస్థల, ఎయిడెడ్, మోడల్, MPUP పాఠశాలల విద్యార్థులు మాత్రమే అర్హులు.
NMMS ఫీజు ఎంత?
OC, BC లకు ₹100; SC, ST లకు ₹50. SBI Collect ద్వారా మాత్రమే చెల్లించాలి.
NMMS పరీక్షలో ఎన్ని ప్రశ్నలు ఉంటాయి?
180 ప్రశ్నలు, 180 మార్కులు. MAT 90 ప్రశ్నలు (90 నిమిషాలు), SAT 90 ప్రశ్నలు (90 నిమిషాలు). ప్రతి ప్రశ్నకు ఒక మార్కు.
NMMS సిలబస్ ఏమిటి?
7వ తరగతి (2025-26) సిలబస్ మొత్తం, 8వ తరగతి (2026-27) అక్టోబర్ వరకు బోధించిన పాఠాలు. SAT లో సైన్స్ (భౌతిక, రసాయన, జీవ), గణితం, సాంఘిక శాస్త్రం (చరిత్ర, భూగోళం, పౌరశాస్త్రం, అర్థశాస్త్రం).
NMMS పరీక్ష తెలుగులో రాయవచ్చా?
రాయవచ్చు. తెలుగు, ఇంగ్లీష్, ఉర్దూ మాధ్యమాల్లో పరీక్ష ఉంటుంది.
AP NMMS 2026 హాల్ టికెట్ ఎప్పుడు?
6 నవంబర్ నాటికి విడుదల కాలేదు. bse.ap.gov.in లో NMMS విభాగంలో వస్తుంది. DEO ఆమోదం 11 నవంబర్ తర్వాత వచ్చే అవకాశం ఉంది.
NMMS స్కాలర్‌షిప్ ఎంత వస్తుంది?
ఏటా ₹12,000 (నెలకు ₹1,000), 9 నుంచి 12వ తరగతి వరకు. National Scholarship Portal ద్వారా బ్యాంకు ఖాతాకు వస్తుంది.
గత NMMS ప్రశ్నపత్రాలు, Key ఎక్కడ దొరుకుతాయి?
bse.ap.gov.in లోని NMMS విభాగంలో డిసెంబర్ 2025, 2024, 2023 ప్రశ్నపత్రాలు, NMMS 2025 Final Key ఉన్నాయి. ఈ పేజీలో 2025 పేపర్ నుంచి 31 ప్రశ్నలు అధికారిక జవాబులతో ఇచ్చాం.
ఆధారాలు: ప్రభుత్వ పరీక్షల సంచాలకుల నోటిఫికేషన్ Rc.No.208/NMMSS/2026 (తేదీ 10-09-2026), గడువు పొడిగింపు ఉత్తర్వు (30-10-2026), పత్రికా ప్రకటన (31-10-2026), NMMS డిసెంబర్ 2025 ప్రశ్నపత్రం, Final Key (23-12-2025) — bse.ap.gov.in.
